"Hiqni postbllokun e Orikut për turistët”

VLORË - Drejtuesit e Parkut Arkeologjik dhe bashkia e Orikumit u kërkojmë institucioneve përkatëse shtetërore heqjen e rrethimit për qendrën e Orikut dhe liberalizimin e hyrjes së turistëve në këtë vend me vlera të rralla kulturore dhe historike. Siç pohojnë drejtuesit e Bashkisë për Gazetën, kërkesa është formuluar para dy ditësh dhe u është nisur zyrtarisht ministrit të Mbrojtjes dhe ministrit të Turizmit. “Moslejimi i kalimit të turistëve brenda zonës ushtarake të Orikut po mban peng zhvillimin e gjithë zonës, pasi kjo është pika më e rëndësishme turistike. Kjo perlë vazhdon të jetë peng i disa objekteve pa rëndësi e jashtë funksionit të Bazës së Pashalimanit”, - thuhet mes të tjerave në kërkesën zyrtare. Sot për të vajtur aty duhet të marrësh leje dy ditë përpara. Për turistët kjo gjë është e pamundur. Ndaj, bashkia dhe drejtuesit e Parkut Arkeologjik kërkojnë ndërhyrje sa më të shpejtë. Të shtunën që shkoi, për herë të parë, Parku i Orikut qe i gjithi i qytetarëve dhe të ftuarve në festën e çeljes zyrtare të sezonit turistik nga bashkia e Orikumit. Brenda Parkut u zhvilluan një sërë aktivitetesh të rëndësishme kulturore e sportive. Por vetëm për një ditë, pasi në hyrje të tij, të nesërmen në mëngjes u rivu postblloku me paralajmërimin: “Ndal! Zonë ushtarake!”. Drejtuesit e bashkisë shpresojnë që përgjigja nga ministritë të jetë e shpejtë, në mënyrë që këtë vit turistik, vizitorë vendas dhe të huaj të kenë mundësi të vizitojnë Orikun e lashtësisë.