Turistët e parë të sezonit, drejt parqeve arkeologjike



Vetëm dy ditë pas çeljes së sezonit të ri turistik një kruazierë tjetër ka sjellë grupin më të madh të turistëve të huaj deri tani. "Pacifik Prince" ka qenë kruaziera 11-katëshe e ankoruar në Gjirin e Sarandës. Në rreth 700 arrinte numri i turistëve në bordin e tij, shumica e të cilëve ishin amerikanë, anglezë e francezë. Burime portuale thanë se për shoqërinë turistike "Knjuard", e mirënjohur në botë, është hera e parë që është e pranishme në Sarandë, gjë që i atribuohet partneritetit të shoqërisë turistike "Sipa Tours" me të. Guida e turistëve të mbërritur ka qenë alternative, duke iu ofruar Butrintin, Mesopotaminë, Syrin e Kaltër, Kalanë e Lëkurësit, por edhe qytetin e Gjirokastrës. Jo pak prej turistëve të ditës së djeshme kanë preferuar të jenë të lirë për të shëtitur dhe e kanë shpenzuar kohën duke bërë shoping në qytetin e Sarandës, apo duke shkuar në periferitë e afërta të saj, pasi kanë marrë makina me qira, apo duke përdorur shërbimin taksi. Turistët e huaj të kësaj fillim jave erdhën në Sarandë nga qyteti port i Solentos në Itali dhe kanë vazhduar udhëtimin në Dubrovnik.