Redon Makashi, romantiku i perjetshem

Baladat e dashurisë në muzikën e lehtë shqiptare nuk do të kishin kuptim pa këngëtarin romantik Redon Makashi, karriera muzikore e të cilit ka nisur në vitet 1990. Tre albume në treg dhe shumë hit-e dashurie e kanë renditur Redonin ndër emrat më të preferuar të publikut shqiptar veçanërisht për romantikët. Prej kohësh Redi, sic e thërrasin miqtë e tij, mungon në botën e muzikës me videoklipe dhe këngë të reja, por kjo nuk do të thotë se e ka braktisur këngën, pasionin e tij më të flaktë. Ai vjen pranë artdashësit jo thjesht m albume nga ku pjesa më e madhe e këngëve mbeten në hije, por me një hit i cili shoqërohet me një videoklip. Për prezantimin e këngës së radhës i duhet të mendohet mirë pasi tregu është i tejngopur me “pseudo-këngëtarë” ka shpjeguar ai, duke treguar se e ka të pamundur të jetë në mesin e tyre. Konkurrimi në festivalin e këngës në Radiotelevizion e ka zhgënjyer së tepërmi ndaj Makashi mund të jetë një tjetër artist shqiptar që e braktis atë skenë nga ku dhe nisi ëndrra e tij, prej vitesh e realizuar. Sa për jetën private? Vazhdon të jetë beqar, por jo vetëm. Prej kohësh bashkëjeton me një vajzë për të cilën nuk ka dashur të flasë asnjëherë. I trembet përgjegjësive ndaj dhe ka vendosur të kalojë disa vite në bashkëjetesë dhe më pas të lidhë kurorë. Ndonëse familja e tij jeton prej vitesh ne Amerikë, Redoni nuk mund ta shohë veten larg Shqipërisë, vendit ku ka lindur dhe është rritur, ku ka marrë duartrokitje nga publiku dhe ka mësuar kuptimin e fjalës “sukses”.

INTERVISTA

Redi u bë një kohë e gjatë që i mungoni publikut me këngë dhe videoklipe të reja. Përse po ndodh kjo ?
E vërtetë që mungoj prej disa kohësh me videoklipe apo këngë të reja, por kjo nuk do të thotë që unë nuk po krijoj këngë. Nëse e vini re në Shqipëri, në televizionet muzikore mbizotërojë këngëtarët e rinj etja e të cilëve për t’u bërë të famshëm nuk ndalet, ndërsa unë kam plot vite karrierë mbi supe dhe kam investuar kohë më parë për këtë. Ndoshta kjo ngopje e tregut muzikor me pseudo-këngëtarë ka bërë që të përdor të tjera mënyra për të mos i munguar publikut. Them se kjo situatë do të vazhdojë edhe për pak kohë.

Për një këngëtar profesionist, sikurse jeni ju, cila është mënyra më e mirë për t’u prezantuar në publik?
Për një artist të brezit tim, ose të paktën për mua personalisht, mënyra më e mirë për t’u prezantuar në publik është pjesëmarrja në aktivitete ku interpretohet “live”, sikurse është Festivali i fundvitit. Mendoj se ajo skenë është vendi më i duhur për të treguar talentin tënd, pa dashur të paragjykoj ata që këndojnë vetëm me këngë të regjistruara më parë.

Në kohën kur ju filluat karrierën si këngëtar, cilat mendoni se ishin avantazhet në krahasim me karrierën në ditët e sotme?
Ato vite të cilat ju i referoheni kanë pasur anët pozitive dhe negative të sajat. Për ta nisur me anën negative, them se tekstet e këngëve ishin shumë të kufizuara dhe ç’do këngëtar ishte brenda një kornize, gjithsesi këngët ishin të një cilësie tepër të lartë artistike dhe gjithçka përzgjidhej me shumë seriozitet dhe padyshim ato këngë vazhdojnë t’i rezistojnë kohës.

Mendoni se një ditë shqiptarët do t’i kthehen atyre viteve dhe të krijojnë këngë të mirëfillta të muzikës së lehtë shqiptare, pa huazime dhe imitime?
Sigurisht, ajo kohë po afron. Kam vënë re se kompozitorët janë angazhuar më shumë në krijimet e muzikës së mirëfilltë edhe pse e pranoj që për momentin ka një imitim të tepruar. E kuptoj që si në çdo vend tjetër të botës imitimi ekziston, por nuk duhet të mbizotërojë ky fenomen përkundrazi, të vijë drejt zhdukjes dhe kam besimin se do të ndodhë me kalimin e viteve.

Çfarë mund të më thuash për albumet që keni hedhur në treg? Keni vetëm tre të tillë deri tani.
Po ju do të thoni që kjo është pak, por albumet e mia vazhdojnë të shiten, edhe pse ka kohë që janë hedhur në treg. Këngëtarët e mirëfilltë të këngës së lehtë shqiptare kanë më pak albume në treg dhe shitja e tyre nuk ndodh sikurse me muzikën e imituar. Albumet me këngë të momentit shesin shumë kopje në tre muajt e parë, por më pas të gjithë e harrojnë atë album. Personalisht jam shumë i kënaqur më ecurinë e albumeve të mia.

Mos ndoshta duhet të ripërpunohen baladat tuaja të dashurisë dhe të krijohet një version i ri i këngëve ?
Nuk do të ishte me vend një ide e tillë pasi ato këngë janë krijuar me tinguj dhe nota të mirëfillta, të interpretuara “live”pa asnjë efekt kompjuteri dhe mendoj se kështu do të mbeten. Nuk jam pro idesë së përpunimeve pasi një rikrijim nuk do të ishte kurrë në nivelin e origjinalit të këngës.

Në koncertin e fundvitit u prezantuat në një bashkëpunim me Mira Konçin. Pati hatërmbetje për vlerësimin mesa kam mësuar.
Po ishte një bashkëpunim shumë interesant dhe pse unë më Mirën kam kënduar shumë vite më parë. Është e vërtetë që pati pretendime pasi dihet pjesëmarrja në atë festival. Pse ta fsheh, pësova zhgënjim më tepër nga vlerësimi i Alban Skënderaj i cili nuk i dha asnjë pikë këngës tonë. Po ashtu Gjergj Xhuvani na vlerësoi vetëm me 3 pikë.

Ky zhgënjim do të thotë që nuk do të merrni pjesë në atë festival ?
Për momentin kështu mendoj.

Disa mendojnë se “ka ikur koha” e këngëtarëve të viteve ’90. Çfarë do të shprehni në këtë rast?
Është mendim i gabuar sepse kurrë nuk mund të ikë koha, për më tepër kur bëhet fjalë për muzikën. Për fat të keq edhe unë e kam dëgjuar këtë shprehje, por dua t’i them të gjithë atyre që mendojnë kështu se një këngëtar profesionist nuk mund të dalë kurrë jashtë mode sado të lindin rryma të reja muzikore. Këtë e dëshmon suksesi që kam përjetuar më këngën time të fundit.

Në një tekst të këngës tënde thuhet “Çdo gjë e bukur, dhimbje lë pas”. Kështu ka ndodhur edhe në jetën tënde ?
Sigurisht që pas diçkaje të bukur vjen dhimbja, (qesh) mërzitemi për momentet e bukura që mbarojnë, lëndohemi nga një histori dashurie e përfunduar dhe ndoshta ky është kuptimi i atij teksti. Edhe në jetën time ka pasur të tilla momente dhimbjeje pas momenteve të bukura.

Në raport me femrat, ke shkaktuar apo të kanë shkaktuar më shumë dhimbje ?
Ndoshta unë i kam shkaktuar i pari dhimbjet, por më pas kam pësuar dhimbje edhe unë….

Ç’po ndodh në jetën tënde private, ke menduar për martesën ?
Jeta private nuk ka asgjë të re. Vazhdoj të jem i pamartuar,(qesh) por jo i vetmuar. Bashkëjetoj me dikë dhe ndihem rehat. Ende nuk kam menduar seriozisht për martesën sepse i frikem përgjegjësive. Në martesë është ndryshe, ka orare fikse për t’u zbatuar dhe shumë detyrime të tjera nga të cilat dua të jem i lirë, por mendoj se një ditë do të ndodhë edhe martesa, por se kur; këtë nuk e kam menduar.

Sa ke arritur të eksplorosh nga bota e femrës ?
Nuk kam arritur ta eksploroj dhe as nuk pretendoj ta eksploroj dot të gjithën. Në momentin kur mendon se e njeh mirë një femër në të vërtetë nuk e njeh aspak dhe nuk ka psikolog që të arrijë ta eksplorojë (qesh). Të më qëndrojë pranë në momente të vështira, atëherë kur unë kam nevojë më tepër për të.

Ka një lidhje mes Redonit dhe Anglisë ?
Gjithmonë kam qenë i lidhur me muzikën angleze dhe do të vazhdoj të jem. Po ashtu një lidhje tjetër janë koncertet që unë kam zhvilluar në Londër para 4 vitesh dhe madje e mbaj mend pasi për një moment m’u krijua përshtypja se isha në dasëm, pasi shqiptarët hidhnin sterlina në skenë dhe kjo më befasoi shumë. Kurrë nuk kisha parë kaq shumë sterlina në podiumin e një skene...(qesh)

Një arsye për të cilën do të braktisje muzikën ?
Nuk ka asnjë arsye. Nuk do të heq dorë nga muzika kurrë pasi muzika është pasioni im dhe do të vazhdojë të jetë.